فیصل آباد(اسپورٹس ڈیسک) پاکستان اور جنوبی افریقہ کے درمیان تین میچوں پر مشتمل ون ڈے سیریز کا تیسرا اور فیصلہ کن مقابلہ آج اقبال اسٹیڈیم فیصل آباد میں کھیلا جائے گا۔سیریز اس وقت 1-1 سے برابر ہے، جس کے بعد آج کا میچ دونوں ٹیموں کے لیے فائنل کی حیثیت اختیار کر گیا ہے۔میچ سے قبل قومی ٹیم نے بھرپور پریکٹس سیشن میں حصہ لیا، جس میں کھلاڑیوں نے بیٹنگ، بولنگ اور فیلڈنگ پر خصوصی توجہ دی۔ کوچنگ اسٹاف کی نگرانی میں ٹیم نے مختلف میچ سنیریوز پر بھی مشق کی۔سیریز کے پہلے میچ میں پاکستان نے سنسنی خیز مقابلے کے بعد جنوبی افریقہ کو دو وکٹوں سے شکست دی تھی، جب کہ دوسرے ون ڈے میں مہمان ٹیم نے شاندار کم بیک کرتے ہوئے گرین شرٹس کو آٹھ وکٹوں سے ہرایا۔ آج کے میچ میں دونوں ٹیمیں سیریز جیتنے کے عزم کے ساتھ میدان میں اتریں گی، اور شائقین کو ایک دلچسپ مقابلے کی توقع ہے۔
