کراچی (سینیئر رپورٹر) وزیراعلیٰ سندھ سید مراد علی شاہ نے کیول آرٹ گیلری میں ’’نورٌ علیٰ نور‘‘ آرٹ نمائش کا افتتاح کر دیا۔ یہ نمائش دعوتِ ہادیہ کی سرپرستی اور ریڈیئنٹ آرٹس کے تحت منعقد ہونے والا ایک اہم ثقافتی پروگرام ہے، جس میں دنیا بھر کے فنکاروں کے تخلیقی و روحانی فن پارے پیش کیے گئے ہیں۔ نمائش کی کیوریٹر الفیہ عباس علی نے مختلف فنون کے ذریعے الہٰی نور کے تصور کو منفرد انداز میں پیش کرنے والے کام یکجا کیے ہیں۔وزیراعلیٰ کے پہنچنے پر دعوتِ ہادیہ کے کمال یونس اور ریڈیئنٹ آرٹس کی ٹیم نے ان کا خیرمقدم کیا اور نمائش کے موضوع، فنکارانہ پہلوؤں اور عالمی شرکت کے بارے میں تفصیلی بریفنگ دی۔ وزیراعلیٰ نے فیتہ کاٹ کر افتتاح کیا اور بعد ازاں 19 ڈسپلے کارنرز کا معائنہ کیا، جن میں مصوری، خطاطی، مقدس جیومیٹری، روشن شدہ فن پارے، ٹیکسٹائل آرٹ اور انسٹالیشنز شامل تھیں۔مراد علی شاہ نے فن پاروں کے معیار کی تعریف کرتے ہوئے کہا کہ ’’یہ نمائش تخلیق اور روحانیت کا شاندار امتزاج ہے۔ فنکاروں نے ربانی رہنمائی کی علامت کے طور پر نور کے تصور کو نہایت خوبصورتی سے پیش کیا ہے، جو روح کو جِلا بخشنے کے ساتھ ساتھ ثقافتی فہم میں اضافہ کرتی ہے۔‘‘انہوں نے کہا کہ سندھ ہمیشہ تنوع، ثقافت اور فکری اظہار کو فروغ دیتا آیا ہے۔ ریڈیئنٹ آرٹس اور داؤدی بوہرا کمیونٹی کی کاوشوں کو سراہتے ہوئے وزیراعلیٰ نے کہا کہ یہ نمائش امن، ہم آہنگی اور روشن خیالی کی مشترکہ اقدار کو اجاگر کرتی ہے۔نمائش کا مرکزی خیال سورۃ النور کی آیتِ نور سے ماخوذ ہے، جس نے صدیوں تک اسلامی فنون و روحانی روایت کو رہنمائی فراہم کی۔ فنکاروں نے مقدس جیومیٹری، قرآنی خطاطی اور علامتی اشکال کے ذریعے تاریکی سے روشنی کے سفر کو ’’نورٌ علیٰ نور‘‘ کے طور پر پیش کیا ہے۔ریڈیئنٹ آرٹس—انوار الفنون—داؤدی بوہرا کمیونٹی کا خواتین کی سربراہی میں چلنے والا ایک سماجی پلیٹ فارم ہے، جو 2017 سے اسلامی اور ثقافتی ورثے سے جڑے فنون کو فروغ دے رہا ہے۔ یہ ادارہ دنیا کے مختلف ممالک میں 14 نمائشیں منعقد کر چکا ہے، جبکہ کراچی میں یہ ان کی پہلی نمائش ہے، جو پاکستان میں کمیونٹی کی ثقافتی سرگرمیوں کا اہم سنگِ میل قرار دی جا رہی ہے۔ وزیراعلیٰ نے اس پلیٹ فارم کی کوششوں کو سراہتے ہوئے کہا کہ ’’ایسی سرگرمیاں معاشرتی ہم آہنگی کو مضبوط کرتی ہیں اور نوجوان نسل کو اپنے ورثے سے جڑنے کا موقع فراہم کرتی ہیں۔‘‘ اختتام پر منتظمین نے وزیراعلیٰ سندھ کے تعاون اور فنون کے ذریعے یکجہتی کے فروغ کے اعتراف پر ان کا شکریہ ادا کیا۔
