چیف جسٹس لاہور ہائی کورٹ جسٹس مس عالیہ نیلم نے صوبہ بھر کی تمام عدالتوں میں ججز، عدالتی عملہ، وکلاء اور سائلین کی جان و مال کے تحفظ کو یقینی بنانے کے لیے فوری، جامع اور فول پروف سیکیورٹی انتظامات کے احکامات جاری کر دیے ہیں۔فاضل چیف جسٹس نے کہا ہے کہ عدالتی نظام کے تقدس اور انصاف کی فراہمی کے عمل کو ہر قسم کے خوف، دباؤ اور خطرے سے محفوظ بنانا عدلیہ کی اولین ترجیح ہے۔فاضل چیف جسٹس نے اسلام آباد کچہری کے باہر دہشتگردی کے افسوسناک واقعہ پر گہرے دکھ اور افسوس کا اظہار کرتے ہوئے کہا کہ ایسے واقعات عدالتی نظام کی سلامتی کو مزید مضبوط بنانے کی ضرورت کو اجاگر کرتے ہیں۔انہوں نے متعلقہ پولیس حکام کو ہدایت کی ہے کہ لاہور ہائی کورٹ اور ضلعی عدالتوں کی سیکیورٹی انتظامات میں موجود ممکنہ خامیوں کی نشاندہی کی جائے اور انہیں دور کرنے کے لیے تمام دستیاب وسائل بروئے کار لائے جائیں۔
