وزیرِ اعظم محمد شہباز شریف (پولیٹیکل رپورٹر ) کی زیرِ صدارت وفاقی کابینہ کا اجلاس منعقد ہوا جس کی صدارت انہوں نے ویڈیو لنک کے ذریعے باکو سے کی۔اجلاس میں وفاقی کابینہ نے 27ویں آئینی ترمیم کے مسودے کی باقاعدہ منظوری دیتے ہوئے اس کا بھرپور خیر مقدم کیا۔ وزیرِ اعظم نے کابینہ ارکان اور اتحادی جماعتوں کا شکریہ ادا کرتے ہوئے قومی اتفاقِ رائے کو خوش آئند قرار دیا۔کابینہ سے منظوری کے بعد وزیرِ اعظم کی ہدایت پر وزیرِ قانون و انصاف نے میڈیا کو ترمیم کے خدوخال سے متعلق بریفنگ دی جبکہ ترمیمی مسودہ اب پارلیمان میں پیش کیا جائے گا۔
وزیرِ اعظم نے کہا کہ وفاق اور صوبوں کے درمیان تعلقات کی مضبوطی اور ملکی مفاد کے لیے 27ویں آئینی ترمیم پر اجتماعی کوشش کی گئی، جس پر وزارتِ قانون، اٹارنی جنرل اور ان کی ٹیم مبارکباد کی مستحق ہے۔انہوں نے بتایا کہ مسودے پر قائد مسلم لیگ (ن) میاں محمد نواز شریف سے رہنمائی حاصل کی گئی صدر مملکت آصف علی زرداری کو اعتماد میں لے کر ان کی رضامندی حاصل کی گئی،اتحادی قیادت بالخصوص بلاول بھٹو زرداری، ڈاکٹر خالد مقبول صدیقی، عبدالعلیم خان، خالد حسین مگسی اور چوہدری سالک حسین سے مشاورت کی گئی ایمل ولی خان، اعجاز الحق اور دیگر سیاسی رہنماؤں کو بھی اعتماد میں لیا گیاوزیرِ اعظم نے کہا کہ ملک میں سیاسی و معاشی استحکام کی بدولت ملکی سمت درست ہوئی ہے اور ترقی و خوشحالی کے لیے سب کو مشترکہ کردار ادا کرنا ہوگا۔
