لاہور (پولیٹیکل رپورٹر )ورلڈ بینک کی ماحولیاتی تبدیلی گروپ (Climate Change Group) کی گلوبل ڈائریکٹر ویلیری ہیکی نے وزیراعلیٰ پنجاب مریم نواز شریف کے ماحول دوست اقدامات اور وژن کو عالمی سطح پر سراہتے ہوئے انہیں "کلائمیٹ چینج وارئیر” اور "کلائمیٹ لیڈر” قرار دیا ہے۔ورلڈ بینک کی گلوبل ڈائریکٹر ویلیری ہیکی نے وزیراعلیٰ پنجاب سے ملاقات کے دوران کہا کہ “مریم نواز شریف جنوبی ایشیا سے بطور ’کلائمیٹ چینج وارئیر‘ ابھر کر سامنے آئی ہیں۔”انہوں نے کہا کہ ورلڈ بینک پنجاب حکومت کو عالمی ماحولیاتی مارکیٹ میں شمولیت کی دعوت دیتا ہے اور اس ضمن میں مکمل تعاون فراہم کرے گا۔ ویلیری ہیکی کے مطابق، ورلڈ بینک "ستھرا پنجاب”، فضائی معیار (AQI)، ماحول دوست ٹرانسپورٹ، جنگلات اور جنگلی حیات کے تحفظ سے متعلق منصوبوں میں پنجاب حکومت کے ساتھ شراکت داری کے لیے تیار ہے۔
ویلیری ہیکی نے وزیراعلیٰ پنجاب کی تقریر کے تین نکات کو خصوصی طور پر سراہا، جن میں مریم نواز شریف کا یہ کہنا شامل ہے کہ “COP30 کو محض اظہارِ خیال کی مجلس کے بجائے پختہ عزم و ارادے کے عہد کے طور پر یاد رکھا جانا چاہیے”،
"گلوبل سائوتھ احتجاج نہیں، بامقصد آواز بن کر سامنے آیا ہے”، اور "ماحول کی بہتری خیرات نہیں، انصاف ہے۔”ان کا کہنا تھا کہ ایک خاتون وزیراعلیٰ کے طور پر مریم نواز شریف نے ماحولیاتی قیادت میں عزم، ہمت اور تخلیق کی مثال قائم کی ہے۔ انہوں نے کہا کہ پنجاب حکومت کا کسی کا انتظار کیے بغیر ماحول کی بہتری کے ایجنڈے پر عملدرآمد قابلِ تحسین ہے۔وزیراعلیٰ پنجاب مریم نواز شریف نے ویلیری ہیکی کے جذبات اور تعاون پر شکریہ ادا کرتے ہوئے کہا کہ پنجاب کو خطے ہی نہیں بلکہ دنیا بھر میں ماحولیاتی بہتری کی قابلِ تقلید مثال بنانا ان کا ہدف ہے۔ملاقات میں سینئر صوبائی وزیر مریم اورنگزیب، صوبائی وزرا رانا سکندر اور ذیشان رفیق، چیف سیکرٹری زاہد اختر زمان، چیئرمین پی اینڈ ڈی نعیم رؤف اور ڈی جی ای پی اے عمران حامد بھی شریک تھے۔
