اسلام آباد(نمائیندہ خصوصی) معاون خصوصی طارق فاطمی اور سیکرٹری خارجہ بھی ملاقات میں موجود تھے۔وزیراعظم نے کینیڈین ہائی کمشنر کو تقرری پر مبارکباد پیش کی اور اس اعتماد کا اظہار کیا کہ ان کی تعیناتی کے دوران پاکستان اور کینیڈا کے درمیان دیرینہ اور دوستانہ تعلقات مزید مستحکم ہوں گے۔ انہوں نے کینیڈین قیادت کے لیے خیر سگالی کا پیغام بھی دیا. وزیراعظم نے کہا کہ پاکستان کینیڈا کے ساتھ تعلقات کی مزید مضبوطی کا خواہاں ہے۔وزیر اعظم نے کہا کہ پاکستان میں کان کنی اور معدنیات کے شعبے میں سرمایہ کاری کے وسیع مواقع موجود ہیں. ریکوڈک منصوبے کا ذکر کرتے ہوئے وزیرِ اعظم نے کہا کہ بیرک گولڈ پاکستان کے کان کنی کے شعبے میں ترقی کی راہ ہموار کرنے کے ساتھ ساتھ پاکستان اور کینیڈا اقتصادی تعاون کی کامیابی کی سند ثابت ہوگا. کینیڈین ہائی کمشنر نے وزیراعظم کا شکریہ ادا کیا اور پاکستان اور کینیڈا کے دوطرفہ تعلقات بالخصوص زراعت، توانائی، تجارت، سرمایہ کاری، ٹیکنالوجی، تعلیم اور عوامی تبادلوں کو مزید فروغ دینے کے لیے کام کرنے کے عزم کا اظہار کیا۔وزیر اعظم نے کینیڈا میں مقیم پاکستانیوں کے کینڈا کی تعمیر و ترقی میں گراں قدر کردار کو سراہا جو دونوں ممالک کے مابین تعلقات کی مضبوطی کیلئے پُل کا کردار ادا کرتے ہیں.
