لاہور (نمایندہ خصوصی) وزیر اعلیٰ پنجاب مریم نواز شریف نے لاہور ڈیولپمنٹ پلان کے دوسرے فیز کا باقاعدہ آغاز کر دیا ہے، جس کے تحت شہر کی 6,284 گلیوں کی مکمل اپ گریڈیشن کی جائے گی۔ اس منصوبے کے مطابق آئندہ سال 30 جون تک لاہور میونسپل کارپوریشن کی 5,798 اور WASA کی 486 گلیوں کو جدید اور باعزت بنایا جائے گا۔
وزیر اعلیٰ کی زیر صدارت فیز ٹو کے حوالے سے اجلاس میں تفصیلی بریفنگ دی گئی اور تمام متعلقہ حکام کو ضروری ہدایات جاری کی گئیں۔ مریم نواز شریف نے کہا کہ لاہور کے ہر محلے کو روشن، آباد اور ٹوٹ پھوٹ سے آزاد بنایا جائے گا، اور شہر کی ترقی میں معیار پر کوئی سمجھوتہ نہیں ہوگا۔
انہوں نے کہا کہ لاہور ڈیولپمنٹ پلان فیز ٹو کی تکمیل میں کسی قسم کی تاخیر برداشت نہیں کی جائے گی، اور منصوبے کے تحت شہر کے ہر کونے کو شہریوں کے لیے باعزت اور رہائش کے لیے فخر کی علامت بنایا جائے گا۔
وزیر اعلیٰ نے ماہانہ ورک پلان کے تحت منصوبے کی مرحلہ وار تکمیل کو یقینی بنانے کی ہدایت کی، تاکہ لاہور کا حسن و جمال پہلے سے کہیں زیادہ باکمال اور شہری زندگی کے لیے خوشگوار بنایا جا سکے۔