اس موقع پر پنجاب میں گوگل ٹیک ویلی ڈیجیٹل ٹرانسفارمیشن ایڈوائزری بورڈ قائم کرنے کا فیصلہ کیا گیا۔ وزیراعلیٰ مریم نواز شریف اور صوبائی وزراء نے آفیشل ورکشاپ ’’ایمپاورنگ پنجاب ود اے آئی‘‘ میں شرکت کی، جس کا باقاعدہ آغاز وزراء کی حاضری سے کیا گیا۔
ورکشاپ کے دوران پنجاب کابینہ کے ارکان کو گوگل جیمنائی کے مؤثر اور ذمہ دارانہ استعمال پر بریفننگ دی گئی۔ شرکاء کو گورننس اور پالیسی فریم ورک کی تشکیل میں اے آئی کے استعمال، آپریشنل پالیسی سازی، شعبہ جاتی اصلاحات، پالیسی سمری کے تجزیے اور گوگل ٹولز کے عملی استعمال سے آگاہ کیا گیا۔
ورکشاپ سے خطاب کرتے ہوئے وزیراعلیٰ مریم نواز شریف نے کہا کہ ڈیجیٹل ٹیکنالوجی سوچ اور کام کے طریقہ کار کو بدل سکتی ہے، جبکہ اصلاحات اور مؤثر پالیسی سازی میں اے آئی کی معاونت ناگزیر ہو چکی ہے۔ انہوں نے کہا کہ اے آئی ٹولز کا ذمہ داری سے استعمال مثبت اور دیرپا تبدیلیاں لا سکتا ہے۔
اجلاس میں گوگل فار ایجوکیشن کے ماہرین نے تفصیلی بریفننگ دی جس میں بتایا گیا کہ پنجاب میں ٹیک ویلی گوگل فار ایجوکیشن کے پلیٹ فارم کے تحت تین ہزار اساتذہ کی ماسٹر ٹریننگ مکمل کی جا رہی ہے، سکول ایجوکیشن ڈیپارٹمنٹ میں تین لاکھ سے زائد طلبہ کی ڈیجیٹل آئی ڈیز قائم کی جا چکی ہیں جبکہ پنجاب ایجوکیشن فاؤنڈیشن کے تحت دو لاکھ طلبہ اور دو ہزار اساتذہ کو تربیت دی جا رہی ہے۔
بریفننگ میں ڈیجیٹل صحافت کے فروغ کے لیے دس اداروں کے لیے ایک ہزار اسکالرشپس دینے کا بھی اعلان کیا گیا۔ گوگل ٹیم نے لاہور کی تاریخی اور ثقافتی اہمیت کو سراہتے ہوئے شہر کو تاریخ اور ثقافت کا حسین امتزاج قرار دیا اور وزیراعلیٰ مریم نواز شریف کی جانب سے سال کو ’’یوتھ کا سال‘‘ قرار دینے کے فیصلے کو خراجِ تحسین پیش کیا۔
