پنجاب اسمبلی میں قائمہ کمیٹی برائے قانون و پارلیمانی امور کا اجلاس چیئرپرسن محمد ارشد ملک ایم پی اے اور صوبائی وزیرِ قانون رانا محمد اقبال خان کی مشترکہ صدارت میں منعقد ہوا۔ اجلاس میں قانون و پارلیمانی امور سے متعلق اہم معاملات پر تفصیلی غور کیا گیا۔
اجلاس میں پنجاب اسمبلی کے متعدد اراکین نے بھرپور شرکت کی۔ سیکرٹری قانون آصف بلال لودھی نے گزشتہ اجلاس کے منٹس پر کمیٹی کو تفصیلی بریفنگ دی۔
اجلاس میں تحصیل بارز کی گرانٹ 25 لاکھ روپے سے بڑھا کر 50 لاکھ روپے اور ڈسٹرکٹ بارز کی گرانٹ 50 لاکھ سے بڑھا کر 75 لاکھ روپے کرنے کی تجاویز پر غور کیا گیا۔ اس کے علاوہ لیگل ایڈوائزرز کو ٹی اے اور ڈی اے دینے، ڈویژنل ہیڈکوارٹرز کی گرانٹ میں اضافے اور قانون کی تعلیم حاصل کرنے والے طلبہ کے لیے انٹرن شپ کے مواقع بڑھانے کی تجاویز بھی زیر بحث آئیں۔
کمیٹی کو محکمہ قانون کی 29 ترقیاتی اسکیموں پر بریفنگ دی گئی جن میں 4 جاری جبکہ 25 نئی اسکیمیں شامل ہیں۔ جاری اسکیموں میں پنجاب جوڈیشل اکیڈمی اور مختلف اضلاع میں ڈسٹرکٹ اٹارنی آفسز شامل ہیں، جن میں متعدد منصوبے تکمیل کے قریب ہیں۔
اجلاس کو آگاہ کیا گیا کہ وزیراعلیٰ پنجاب کی ہدایت پر صوبے بھر میں لیڈی بار رومز کی تعمیر جاری ہے، جن کی تعداد 38 سے بڑھا کر 101 کر دی گئی ہے۔ لیڈی بار رومز جون 2026 تک مکمل کرنے کا ہدف مقرر کیا گیا ہے۔
کمیٹی کو پنجاب بھر میں جدید جوڈیشل ٹاورز کی تعمیر کے منصوبے پر بھی بریفنگ دی گئی۔ پہلے مرحلے میں 4 جوڈیشل ٹاورز 2027 تک مکمل کیے جائیں گے جبکہ مستقبل میں ان کی مجموعی تعداد 9 تک پہنچائی جائے گی۔
میانوالی، منڈی بہاؤالدین، خانیوال، سرگودھا اور جہلم میں ڈسٹرکٹ اٹارنی آفسز جبکہ بہاولپور میں ایڈووکیٹ جنرل آفس سے متعلق منصوبوں پر بھی تفصیلی بریفنگ دی گئی۔
اجلاس میں محکمہ قانون کی آئی ٹی اینڈ گورننس اسکیم، مالی سال 2025-26 کی پہلی ششماہی کے بجٹ استعمال، ترقیاتی فنڈز کے مؤثر استعمال اور پنجاب جوڈیشل اکیڈمی کالا شاہ کاکو کیمپس لاہور کے قیام کے منصوبے پر فالو اپ کا جائزہ لیا گیا۔
اجلاس میں محکمہ قانون کی سول کیسز ایپ کو سراہا گیا اور کمیٹی کو بتایا گیا کہ جون 2026 تک پنجاب مکمل طور پر ڈیجیٹائز ہو جائے گا، جس سے عدالتی نظام میں انقلابی تبدیلی آئے گی۔
کمیٹی اجلاس میں قانون کی بہتری اور ادارہ جاتی اصلاحات پر زور دیا گیا۔ اجلاس میں ایم پی ایز فرذانہ عباس کمبوہ، سردار خان بہادر ڈوگر، پارلیمانی سیکرٹری خالد محمود رانجھا، ڈپٹی سیکرٹری ایڈمن لاء اعتزاز اسلم، محکمہ قانون کے افسران اور دیگر متعلقہ حکام نے شرکت کی۔