لاہور ( کرائم رپورٹر) لاہور پولیس نے خفیہ اطلاع پر کارروائی کرتے ہوئے غیر ملکی انٹرنیشنل کرکٹ میچز پر آن لائن جوا کرانے والے ایک نیٹ ورک کو کامیابی سے پکڑ لیا ہے۔ چوکی انچارج ایل بلاک کی قیادت میں پولیس ٹیم نے یہ آپریشن مکمل کیا، جس میں دو کلیدی ملزمان زاہد حمید اور محمد عاطف کو گرفتار کر لیا گیا۔ملزمان آن لائن مختلف موبائل ایپلیکیشنز اور اکاؤنٹس کے ذریعے بین الاقوامی کرکٹ میچز پر جوا کرواتے تھے اور گروپ جوا کا بھی اہتمام کرتے تھے۔ گرفتاری کے وقت ملزمان کے قبضے سے متعدد موبائل فونز، ایل سی ڈی، لیپ ٹاپ اور ایک لاکھ 15 ہزار روپے سے زائد نقد رقم برآمد ہوئی۔پولیس حکام کے مطابق یہ نیٹ ورک غیر قانونی طور پر کرکٹ بیٹنگ کے ذریعے لوگوں کو جوئے میں ملوث کر رہا تھا، جو پاکستان میں سختی سے ممنوع ہے۔ ملزمان کے خلاف مقدمہ درج کر لیا گیا ہے اور تفتیش جاری ہے تاکہ نیٹ ورک کے دیگر ممکنہ ارکان کا پتہ لگایا جا سکے۔یہ کارروائی جوئے اور غیر قانونی بیٹنگ کے خلاف پولیس کی مسلسل مہم کا حصہ ہے، جو عوام کی مالی اور سماجی حفاظت کے لیے کی جا رہی ہے۔ حکام نے شہریوں سے اپیل کی ہے کہ جوا یا اس سے متعلق کسی بھی سرگرمی کی اطلاع فوری طور پر قریبی تھانے یا پولیس ہیلپ لائن پر دیں۔
