ذرائع کے مطابق پی سی بی نے 15 رکنی ابتدائی اسکواڈ کے ساتھ ساتھ چند ریزرو کھلاڑیوں کے نام بھی آئی سی سی کو بھجوا دیے ہیں۔ بورڈ کو 31 جنوری تک آئی سی سی کی اجازت کے بغیر اسکواڈ میں تبدیلی کا اختیار حاصل ہوگا، تاہم اس تاریخ کے بعد کسی بھی رد و بدل کے لیے آئی سی سی کی ٹیکنیکل کمیٹی سے منظوری لینا لازم ہوگی۔ذرائع کا کہنا ہے کہ پاکستان کرکٹ بورڈ سری لنکا کے خلاف آئندہ سیریز کے اختتام کے بعد ورلڈ کپ اور آسٹریلیا کے خلاف سیریز کے لیے حتمی اسکواڈ کا اعلان کرنے کا ارادہ رکھتا ہے، کیونکہ بورڈ سری لنکا کے خلاف میچز میں ایک یا دو کھلاڑیوں کی کارکردگی کا مزید جائزہ لینا چاہتا ہے۔ابتدائی فہرست میں دورۂ سری لنکا کے کھلاڑیوں کے علاوہ بابر اعظم، شاہین شاہ آفریدی اور حارث رؤف کے نام بھی شامل کیے گئے ہیں۔واضح رہے کہ آئی سی سی ٹی ٹوئنٹی ورلڈ کپ 7 فروری سے بھارت اور سری لنکا میں شروع ہوگا، جبکہ پاکستانی ٹیم اپنے تمام میچز سری لنکا میں کھیلے گی۔
