اسلام آباد (اسٹاف رپورٹر) وفاقی وزیر داخلہ محسن نقوی سے یو کے نیشنل کرائم ایجنسی (NCA) کے ڈائریکٹر جنرل گرائم بیگر نے ملاقات کی، جس میں انسدادِ دہشت گردی، منشیات، انسانی اسمگلنگ، فرانزک، امیگریشن اور پولیس ٹریننگ کے شعبوں میں دوطرفہ تعاون بڑھانے پر تفصیلی تبادلہ خیال کیا گیا۔ملاقات میں برطانوی ہائی کمشنر جین میریٹ، نیشنل کوآرڈینیٹر نیکٹا، ڈی جی این سی سی آئی اے، ڈی جی نیشنل فرانزک ایجنسی، ایڈیشنل سیکرٹری داخلہ، چیف کمشنر اسلام آباد اور آئی جی اسلام آباد پولیس بھی موجود تھے۔
فریقین نے انسدادِ منشیات اور این سی سی آئی اے سمیت مختلف اداروں کے افسران کے لیے تربیتی پروگرامز اور کورسز میں تعاون بڑھانے پر اتفاق کیا۔ اس کے علاوہ بچوں کی آن لائن ہراسانی کے سدباب اور اس سلسلے میں کوآرڈینیشن مزید مؤثر بنانے کا فیصلہ کیا گیا۔
ملاقات میں ایکسٹراڈیشن کے معاملات پر دوطرفہ معاونت بڑھانے پر بھی اتفاق کیا گیا جبکہ بتایا گیا کہ ایکسٹراڈیشن سمیت مختلف شعبوں میں تعاون پر مبنی 5 ایم او یوز کو جلد حتمی شکل دی جائے گی۔ڈی جی نیشنل کرائم ایجنسی گرائم بیگر نے اسلام آباد میں حالیہ خودکش حملے کی مذمت کرتے ہوئے جانی نقصان پر گہرے دکھ کا اظہار کیا۔
وفاقی وزیر داخلہ محسن نقوی نے کہا کہ "دہشت گردی کے تمام تانے بانے ہمسایہ ملک سے ملتے ہیں، پاکستان دہشت گردی کے خلاف جنگ میں غیر متزلزل عزم رکھتا ہے۔ دنیا پاکستان کی استقامت کی مثال دینے سے قاصر ہے۔”انہوں نے مزید کہا کہ جدید فرانزک اور ٹریننگ سے قانون نافذ کرنے والے اداروں کی صلاحیتوں میں نمایاں اضافہ ممکن ہے۔ محسن نقوی نے یہ بھی بتایا کہ اپسکیل کے تعاون سے غیر قانونی امیگریشن روکنے کے لیے مؤثر اقدامات کیے جا رہے ہیں۔ڈی جی این سی اے گرائم بیگر نے مختلف شعبوں میں پاکستان کے ساتھ جاری تعاون کو سراہا اور انسدادِ منشیات کے ضمن میں پاکستان کی کوششوں کی تعریف کی۔
