بیلم(مانیٹرینگ ڈیسک ) ی جی جی آئی عالمی کاربن مارکیٹ اور کاربن فنانسنگ میں پاکستان کی صلاحیت بڑھانے اور دنیا بھر کی کاربن مارکیٹس تک رسائی حاصل کرنے میں مدد دے گا۔ عالمی کاربن مارکیٹ لیڈر جی جی جی آئی نے وزیر اعلیٰ مریم نواز شریف کے موسمیاتی بہتری کے اقدامات کو کاربن کریڈٹس میں تبدیل کرکے گرین گروتھ پروجیکٹس بنانے کی پیشکش کی۔ جی جی جی آئی پنجاب کو صوبائی سطح کے کاربن کریڈٹ پروگراموں میں بھی مدد فراہم کرے گا۔ وزیراعلیٰ مریم نوازشریف اورکِم سینگ ہائپ نے ماحولیاتی تبدیلیوں کے خطرات کے مقابلے کے حوالے سے امور پر تبادلہ خیال کیا۔کِم سینگ ہائپ نے پنجاب حکومت کے ماحولیاتی بہتری کے اقدامات کو سراہا۔کِم سینگ ہائپ نے وزیر اعلیٰ مریم نواز شریف کے پنجاب میں تاریخی سیلاب کی صورتحال سے نمٹنے اور سب سے بڑے ریسکیو اینڈ ریلیف آپریشن کے حوالے سے اقدامات کو بھی سراہا۔ کِم سینگ ہائپ نے کوپ 30 کانفرنس سے وزیراعلیٰ مریم نواز شریف کے خطاب کی بھی تعریف کی۔ کِم سینگ ہائپ نے وزیراعلیٰ مریم نوازشریف کے ماحولیاتی بہتری کے ویژن اور جذبے کو بھی سراہا۔ کِم سینگ ہائپ نے وزیراعلیٰ مریم نوازشریف سے گفتگو کرتے ہوئے کہا کہ آپ کے ویژن سے پنجاب میں ماحولیاتی بہتری کے پختہ عزم کی عکاسی ہوتی ہے۔ آپ کے ساتھ ملکر ماحولیاتی بہتری اور پائیدار ترقی کے اہداف کے حصول کیلئے کام کرنے کے خواہاں ہیں۔ وزیراعلیٰ مریم نواز شریف نے کہا کہ آپ کے تجربات اور معاونت سے ماحولیاتی بہتری کے ویژن کو آگے بڑھانا ہمارے لئے اہم ہے۔ وزیراعلیٰ مریم نوازشریف نے کِم سینگ ہائپ اور جی جی جی آئی کی ماحولیاتی بہتری کے لئے خدمات کو سراہا۔ وزیراعلیٰ مریم نوازشریف نے گزشتہ ڈیڑھ سال کے دوران پنجاب میں اپنی حکومت کے ماحولیاتی بہتری کے اقدامات سے آگاہ کیا۔ گلوبل گرین گروتھ انسٹی ٹیوٹ کاربن فنانس کے شعبے میں اہم کردار ادا کرنیوالا ادارہ ہے۔ جی جی جی آئی گرین گروتھ کے فروغ کیلئے خاص طور پر ترقی پذیر ممالک میں گرین مالی امداد کی سہولت فراہم کرتی ہے۔جی جی جی آئی پیرس معاہدے کے آرٹیکل 6 کے تحت نکات کو عملی جامہ پہنانے اور کاربن ٹرانزیکشن فیسیلٹی (سی ٹی ایف) جیسی سہولیات کی فراہمی پر عملدرآمد کرتی ہے۔ یہ عالمی ادارہ ممالک کو بین الاقوامی کاربن مارکیٹس میں شرکت کیلئے معاونت فراہم کرتی ہے۔ جی جی جی آئی پاکستان کے تین پہلوؤں میں مدد کریگا۔ جی جی جی آئی کے تعاون سے پنجاب اپنے موجودہ موسمیاتی بہتری کے کردار کیساتھ گرین فنانسنگ کی عالمی مارکیٹ میں داخل ہو سکے گا۔ واٹر اینڈ سینی ٹیشن پروگرامز، سُتھرا پنجاب، ای موبیلٹی، اینٹی سموگ مٹیگیشن پروجیکٹس اور پلانٹ فار پاکستان پنجاب کیلئے ممکنہ گرین فنانسنگ پراجیکٹس بن سکیں گے۔ جی جی جی آئی 2012 ء میں اقوام متحدہ کی پائیدار ترقی کی کانفرنس (ریوپلس20) میں تشکیل دیا جانیوالا عالمی اتحاد ہے۔ 18 بنیادی ارکان سے قائم ہونیوالی جی جی جی آئی کے ارکان کی تعداد 2024 تک 50 ہو چکی ہے جبکہ 29 ممالک پارٹنر ہیں۔ جی جی جی آئی خطوں میں شجرکاری، ماحولیاتی بہتری اور گرین گروتھ کے اہداف کیلئے دنیا میں کام کررہی ہے۔کِم سینگ ہائپ اس سے قبل کوریا کے صدارتی کمیشن برائے کاربن نیوٹریلیٹی اینڈ گرین گروتھ کے شریک چیئرمین بھی رہ چکے ہیں۔ سنیئر صوبائی وزیر مریم اورنگزیب اور صوبائی وزرا ء راناسکندرحیات،ذیشان رفیق،چیف سیکرٹری زاہد اختر زمان، چیئر مین پی اینڈ ڈی نعیم رؤف اورڈی جی ای پی اے عمران حامد بھی ملاقات میں موجود تھے۔
