ایشیا کپ (اسپورٹس ڈیسک ) رائزنگ اسٹارز کے پہلے میچ میں پاکستان شاہینز نے عمان کو 40 رنز سے شکست دے کر شاندار فتح حاصل کی۔عمان نے ٹاس جیت کر پہلے بولنگ کرنے کا فیصلہ کیا، جس کے بعد پاکستان شاہینز نے مقررہ 20 اوورز میں 4 وکٹوں کے نقصان پر 220 رنز بنائے۔ معاذ صداقت کی شاندار بیٹنگ نے پاکستان کے اس مجموعے میں اہم کردار ادا کیا، انہوں نے 54 گیندوں پر 5 چوکوں اور 9 چھکوں کی مدد سے 96 رنز کی ناقابل شکست اننگز کھیلی۔ یاسر خان نے 26 رنز بنائے، جبکہ کپتان عرفان خان نے 44 رنز اور سعد مسعود نے 19 رنز کے ساتھ ناٹ آؤٹ رہ کر ٹیم کے اسکور کو مضبوط بنایا۔عمان کی جانب سے شفیق جان، مظاہر رضا، جے اودہرا اور وسیم علی نے ایک، ایک وکٹ حاصل کی۔ہدف کے تعاقب میں عمان کی ٹیم 180 رنز پر ڈھیر ہوگئی۔ عمان کے کپتان حماد مرزا نے 34 رنز بنائے، جبکہ زکریا اسلام 57 رنز کے ساتھ نمایاں بیٹر رہے۔ دیگر کھلاڑیوں میں صفیان یوسف 3، کاران سنوویل 26، وسیم علی 5، ناریان شیشو 1 اور آریان بشت 2 رنز کے ساتھ آؤٹ ہوئے۔ جے اودہرا اور شفیق جان بغیر کوئی رن بنائے پویلین لوٹ گئے، جبکہ سامے شیوسترا اور مظاہر رضا بالترتیب 1 اور 46 رنز کے ساتھ ناٹ آؤٹ رہے۔پاکستان شاہینز کی طرف سے عبید شاہ نے 3 کھلاڑیوں کو آؤٹ کیا، جبکہ معاذ صداقت اور سعد مسعود نے 2، 2 وکٹیں حاصل کیں۔ پاکستان شاہینز اپنا اگلا میچ اتوار کو بھارت کے خلاف کھیلے گی، جس کے لیے شائقین کرکٹ خاصی بے چینی سے منتظر ہیں۔
